維路！2ch嘅「不如收集下一啲不安到死嘅恐怖故好冇？」嘅系列嘅綜合PO出過好多經典嘅故事
八尺大人、扭來扭去同埋上次分享過嘅RINFONE都係出自呢個系列
今次嘅故事出自於2005年「不如收集下一啲不安到死嘅恐怖故好冇？109」入面452樓網友分享嘅一個故事
※以下粗體字係原PO 452樓網友嘅發言 斜體係本人註解
#452
我係做建築相關嘅工作嘅，早幾日，接咗單job係去拆一座喺岩手縣度嘅古老寺廟，而家間寺都已經冇人去
喺去做清拆工作嘅時候，有個同事叫我
「喂452，你過一過嚟丫」我行到去，見到同事腳邊度有個發晒黑嘅長型木箱放喺度
我「咩嚟？」
同事「唔知呀...喺本殿入面一個密封嘅房度搵到嘅，等等我去打畀管理公司問下先」
個木箱大細2m左右，睇嚟好舊咁，我諗啲木都已經有啲化化地
表面度有張白紙貼住咗，上面有啲字寫住，我淨係睇得出係好耐幾前嘅事嚟
又見到好似有啲似梵文咁嘅字，但張紙殘晒已經睇唔清上面寫咩
好辛苦先睇得明幾個字
「大正？？年？？七月以？？之咒法，將兩面宿儺？？？封」 大正即係20世紀10至20年代 原文”宿儺”係用片假名寫 筆劃少好多 咁點解知係宿儺？因為有典故的
大概寫咗啲咁嘢，個木箱又俾釘釘住打唔開
管理公司嘅人覆返「聽日我去問下前住持」
所以嗰日將個木箱放咗喺附近嘅工地度
第2日，喺去到清拆現場前，管理公司打電話嚟
管「嗰個木箱呢，前住持話”絕對唔可以打開！！”咁好激動，話佢無論如何都會嚟攞返咁話，唔該你哋保管住先」
我就喺到達現場前打畀工地阿頭諗住講返個木箱嘅事
我「係咁嘅，尋日嗰個木箱呢」
工頭「呀呀，嗰個嘢！你哋請返嚟做part-time咪有兩個中國留學生嘅？
佢兩個手多多打開咗呀！！唔該你哋快啲嚟」
我有啲不祥預感，趕到去現場，喺工地周圍有5-6個人圍喺度
而嗰兩個part-time就精神恍惚咁坐喺工地前
工頭「呢個衰仔，尋晚同佢朋友貪得意走去開咗個箱
至於裡面呢...你埋嚟睇睇」
單刀直入咁講，就係有個雙手好似拳手咁縮喺前嘅姿勢類似木乃伊定乾屍咁嘅嘢喺度
但係最奇怪係...有兩個頭，睇嚟應該係連體人？
我估一係就係咁樣嘅畸形人，或者只係人工造物...
工頭「唔知係唔係見到所以驚親，佢兩個咩都唔識講咁」
佢兩個無論我點問佢嘢都好，都一直係精神恍惚冇反應（佢哋本身識講流利日文）
岩手都有子取箱….驚！！！
子取箱又名取子箱或小鳥箱 另一個2ch經典 指放死嬰入去送畀人作詛咒
呀唔記得講，嗰個乾屍係
頭係兩側兩個黐埋，手左右各有2隻，腳就正常得一對
真係奇特嘅樣，我都喺網上或者2ch見過唔少畸形相
所以雖然都嚇一跳，但都有諗「呀，可能係畸形或者係人工造」咁樣
然後，嗰兩個留學生就call咗白車送去醫院，喺我哋諗咁樣使唔使報警嘅時候
前住持（起碼80歲）坐佢個仔揸嘅車嚟到 日本有佛教宗派可以結婚生仔 所以有啲寺院係代代相傳 唔使奇怪 正如信耶穌神父唔結婚但牧師可以一樣 宗派唔同啫
住持一嚟到就「係唔係打開咗？！蠢材點解要打開！！冇喇，打開咗就冇喇...」
我哋見到住持咁激動都好突然，跟住住持就喝佢個仔
因為好重岩手口音好難聽得明，所以以下我用返標準語寫返出嚟
住持「你個衰仔！嗰陣咪同咗你講一定要將兩面宿儺大人送去京都嘅XX寺（真係聽唔明）嘅！！乜你冇做到咩！！正蠢材！！」
真係睇唔出成80歲嘅阿伯都咁爭中氣鬧人
住持「打開箱嘅係咩人？喺醫院？我諗佢哋都已經冇得救，唔知有冇用但我都同你哋做場法事」
講真我哋好驚，就係咁就一路聽住啲唸經又俾佢用力拍打背脊同膀頭。好長，我估搞咗成30分鐘
之後住持拎咗個木箱上車，喺臨走前佢講
「好遺憾 你哋唔會長命」
然後嗰兩個留學人嘅其中一個因為醫生都束手無策嘅突發性心筋梗塞而喺病房死咗
另一個就轉送咗去精神病院，清拆隊入面都有3個工人無啦啦發高燒，我都踩釘隻腳聯咗5針
完全唔知詳細係點，但我估
會唔會因為係個畸形人受盡世間嘅歧視冷眼帶住怨恨咁死
因為外型都真係幾奇特...嗰間寺所地嘅地方或者以前嘅村落唔知會唔會有啲嘢係有關呢
可能冇都唔定，但我唔想短命
岩手箱重有冇？
已謝，唔係普通木乃伊嚟呢下幾驚
未完住 後面有網友考察兩面宿儺 另外重冇452嘅後續故事
喺度先暫停一下 插一插《日本書紀》入面有關兩面宿儺嘅記載
原文：（真係原文 原文就係用漢文寫）
「六十五年 飛騨國有一人 曰宿儺 其爲人 壹體有兩面 面各相背 頂合無項 各有手足 其有膝而無膕踵 力多以輕捷 左右佩劒 四手並用弓矢 是以 不随皇命 掠略人民爲樂 於是 遣和珥臣祖難波根子武振熊而誅之」
ID唔同咗但我係452，突然間冇電嚇咗嚇...
我都有蒲開神秘台，所以都對呢啲嘢有興趣
試過好幾次想聯絡住持打聽下真相，不過都被無視
不過同佢一齊嚟嘅佢個仔（50幾做地產）我就知佢嘅聯絡
佢份人都算易話為又傾到偈，我諗會唔會可以喺佢度問到啲咩呢
今晚（好夜）我約到佢去飲嘢，如果問到啲咩嘅聽日再寫
有預感會係一個好故！
要出去記住整返個固定名，你返嚟後再報告啦
#471
係咪有類似咁喺工地度有中國人擅自打開個舊井咁嘅事？
然後就因為咁被鬼上身之類嘅
有啲似子取箱嘅故...驚！
>>471 係呀
重有啲最近神社或者佛閣遭到破壞，都係啲外國人做
>>471 我記得好似係半島人嚟
好似話係想拎為咗鎮住啲冤魂放嘅古錢而撬開個封住嘅井佢
#476
已謝
兩面宿儺嘅故事 我記得喺《宗像教授傳奇考》呢套漫畫度有講過
講有嚟到古時日本嘅外國人，叫宿儺族，將啲文化傳嚟太古時代嘅日本
然後形成咗出雲文化，因幡白兔嘅傳說同大國主建國傳說好似都係話係源於佢哋
之後大和朝廷發起到出雲嘅侵略，被驅趕嘅宿儺族就去到今日嘅飛驒地方
根據日本書紀所講，喺飛驛度有叫宿儺嘅怪物，周圍殺人所以朝廷出兵去討伐
本書講宿儺可能就係喺大和朝廷以前嘅時代已經嚟到日本傳播文化嘅外來人
估計係古印度從事製鐵工作嘅人嚟（然後就係咁將製鐵技術傳咗嚟日本）
然後，喺出雲發現嘅一個洞入面就有「兩面宿儺」像
佢裡面又講宿儺族係坐羅魔船（鏡之船）嚟，係一種好似鏡咁發出黑光嘅船
羅魔讀做「LAMA」係一種黑檀木嘅別名嚟
一個黑漆漆嘅長型木箱，話唔定就係羅魔...？
咁嘅話，呢個兩面宿儺大人可能就係逃亡到岩手地方嘅宿儺族後裔
…可能唔係咁啱神秘台嘅口味 但我諗起呢啲所以寫寫
黑船！！一定係黑船嘅所為！！
黑船係指幕末西方列強嚟日本坐嘅戰艦
一講到出雲地方就同子取箱好似又有啲關連咁，好寒
諗住Google下兩面宿儺點知得一堆萌畫，某程度嚟講重得人驚...
同埋而家淨知>>476所講飛驒妖怪嘅事同兩頭四手
有冇岐阜人可以講多啲
睇到宿儺族我諗起 恐怖驚魂夜2（又名鐮鼬之夜2）定咩都出現過少名毘古那神
唔知有冇咩關係呢
宿儺發音係SUKUNA 少名毘古那神係古事記 日本書紀叫少彥名 係日本神話入面嘅神祇 出雲國風土記叫須久奈比古 “少名/少”同”須久奈”發音一樣都係SUKUNA
唔好意思，臨見面佢先同我講「直接見面講好似都係有啲...」
所以我同佢講「咁可唔可以電話講...」
「可以講嘅我先講」
以呢個做條件聽佢講，講咗大約30分鐘左右
對方係一個幾長氣嘅阿叔嚟，所以我以下摘要
佢「唔好意思，家父反對，其實就算電話講佢都唔想」
我「係我唔好意思先係，係咁追住問，咁嗰個其實係咩嚟？」
佢「嗰個係大正時代，喺啲奇人表演度當展覽俾人睇嘅畸形人嚟」
我「咁即係當時都係用連住嘅狀態生活過？連體人？」
佢「冇錯，出世後幾年，都喺岩手嘅某個部落度生活，因為生活窮困所以父母將佢賣走，最後流落到啲奇人馬戲團度」
我「原來係咁...咁點解會變咗具木乃伊嘅？？」
佢「正確啲嚟講，係叫即身佛」
我「即身佛即係，佢自己嘅意思變成咁嘅？！」
佢「...你，係咪會將呢啲嘢同人講？」
我「老實...我會同人講」
佢「哈你份人真老實，呀呀反正我都冇諗住將所有嘢話你知嘅...
嗰個呢，其實係俾人整成佢咁。當時嘅一個，而家嚟講係好不得了嘅邪教嘅人嚟
咩教恕我唔講得，我知而家呢個教都有地下活動...」
我「係唔係一聽到就”呀呀嗰個教”咁嘅教嚟？」
佢「唔知呀唔知呀（笑）秘密中嘅秘密嚟，真係堅邪教嚟」
我「OK...」
哇好似懸疑小說，同20世紀少年或者魔剎有得比
驚
為咗令人唔好誤解我插插嘴先
喺岩手到今時今日都會用部落呢個字，係好似地域單位咁用
自治公民館都係依部落嘅設
喺關西度講部落會帶有啲歧視意味，但注意返係唔同
見過岩手嘅人講「我係XX部落出身」俾關西嘅人聽到嚇一跳
所以我喺度講句其實係冇睇低人嘅意思，真係會咁用
sor 電腦又無啦啦熄咗所以遲咗...
佢「個教主係一個不得了嘅人嚟，淨係修埋晒啲外法」
我「外法？」
佢「係呀 簡單講就係啲”唔可以做嘅嘢” 較早前真言立川流咪俾人話過係邪教，修外法等等俾人鬧嘅，同佢根本冇得比」 真言宗立川流 某個佛教宗派 會修男女和合雙修嘅「歡喜法」
我「...具體啲即係？」
佢「唔，當時嘅資料都冇咩留低，而且又係假名，加上本身都冇裡面嘅人走返出嚟
我諗就算而家個教重喺度，應該都同而家個教主冇晒關係
個名可以講嘅...叫物部天獄，呢個就係教主名」
我「物部天獄，係假名嚟？」
佢「係呀，假名。聽講呢個天獄去到奇人表演度，買咗好幾個畸形人，包括埋嗰個連體人」
我「...跟住呢？」
佢「你知唔知咩係蠱？3個虫嗰個字」
我「係唔係放啲毒蟲入去個壺度，用生存到最後嗰隻嚟施咒嗰種？（以前漫畫見過）」
佢「係呀係呀！點解你知嘅？？有啲料到喎」
我「er...冇咩嘅...跟住呢？」
佢「呀呀，跟住呢，嗰個天獄就係用人嚟製蠱」
我「將人放入密室？？你講真定講假？」
佢「（有啲啲心情曳咗）我都只係喺我老豆度聽返嚟，冇話100%㗎喎...咁我唔講囉」
我「對唔住！...請繼續」
佢「OK。之後，就係用買返嚟嗰啲畸形人嚟做，唔知喺教團本部定邊度
將佢哋塞晒去密室入面，之後就得返嗰個連體人生還」
我「困咗佢哋幾耐？」
佢「我都唔知詳細。如果我講係去到要食其他人嘅肉，甚至食埋自己嘅屎尿咁耐嘅話 你都想像到」
我「咁我唔係好想想像...」
＋＋☆☆☆☆☆☆☆☆☆☆☆☆☆幸福的回覆☆☆☆☆☆☆☆☆☆☆☆☆
內容唔想譯 係以前好興嗰啲連鎖信
純粹放加個break位 點知中間得呢啲廢文
好驚呀！
佢「之後，好似話天獄為咗令個連體人可以生存到最後而做咗啲手腳
就係事先喺其他畸形人身上整咗啲致命傷，喺佢哋就死就死咁嘅狀態下放入去嘅
同埋嗰個連體人雖然睇落奇怪，但外表睇落有多少似阿修羅像，天獄就係睇中呢個好神聖（好災禍？）咁嘅樣」
我「原來係咁...」
佢「生還咗還生還咗，對天獄嚟講佢只係一件工具
所以好快就將佢一個困住喺房度餓死，然後做防腐處理，將佢整成即身佛
我老豆所講嘅兩面宿儺就係咁完成」
我「兩面宿儺到底係咩嚟？」
※冇>>476巴打講得咁詳細，總之就係接近神話時代咁古時
有一個叫兩面宿儺，雙頭四手嘅怪物
就係以呢個傳說去稱呼嗰個連體人
我「原來係咁...」
佢「嗰個兩面宿儺，天獄將佢當成係教團嘅神體，作為咒佛
咒殺其他人，話唔定可以咒殺好多嘅人，所以整咗個咁嘅咒佛出嚟，至少天獄係咁信」
我「咁詛咒對象係？」
佢「...家父話係國家」
我「即係日本本身？嗰個天獄係唔係癲㗎？」
佢「睇嚟真係癲癲地，不過呢，個詛咒嘅效力唔係得咁少
喺兩面宿儺嘅肚入面，放咗某樣嘢...」
我「咩嘢？」
佢「古代人嘅骨，俾大和朝廷滅絕嘅”不服之民” 即係所謂朝廷眼中嘅叛逆者，逆賊
將嗰啲古代人嘅骨粉末放入去佢肚入面...」
我「呢啲咁嘅嘢喺邊度搵到㗎...？！」
佢「你睇電視報紙都有見過㗎？發掘啲古代遺跡或者墳墓嗰陣有好多發掘隊嘅人
當時嘅保安冇咁嚴密...所以好似喺嗰啲地方偷返嚟」
#504
諗起真女神系列外傳天魔變入面嘅紅色人格面具
哇哇驚驚
咁驚，呢個咁似大塚英志啲作品嘅
民俗學家兼漫畫家
>>504 天魔變同PERSONA唔同 我估你係講阿耆尼 佢係ATMA嚟
原型係神
印度神話嘅火神
超驚
我「都好難以置信...」
佢「係呀呢？我都係咁諗。不過呢，大正時代發生嘅災害都唔少
1914（大正3）年：櫻島山火噴發（9600人傷）
1914（大正3）年：秋田大地震（94人死）
1914（大正3）年：方城礦爆炸（687人死）
1916（大正5）年：函館大火災
1917（大正6）年：東日本大水災（1300人死）
1917（大正6）年：桐野炭礦爆炸（361人死）
1922（大正11）年：親不知雪崩列車事故（130人死） 北陸線列車雪崩直撃事故
然後，1923年（大正12年）9月1 關東大震災 失蹤及死亡人數14萬2千8百
我「咁即係點？」
佢「全部都係兩面宿儺移動過嘅地域嚟」
我「唔係呱！教團有咁多支部喺各地？巧合嚟啫（我笑咗）」
佢「我都覺得無稽。但係，大正時代最大嘅災害，關東大震災嗰日
嗰日，地震發生前天獄死咗」
我「死咗？」
佢「自殺，聽聞係咁。同埋有傳聞佢唔係純日本人嚟...」
我「點樣死？」
佢「用日本刀割喉，喺兩面宿儺面前，重有用血寫嘅遺書...」
我「寫咗啲咩？？」
日 本 該 當 滅 亡
會唔會弊咗啲
點解咁憎恨日本嘅？
古代日本史搵唔搵到啲淵源呢？
可唔可以寫低份筆記畀我呢？
我「...係喺關東大震災發生之前？」
佢「係」
我「...巧合啫？」
佢「...巧合呱」
我「嗰陣，兩面宿儺同天獄喺邊...？？」
佢「聽講喺震源附近嘅相模灣沿岸」
我「...咁之後，因咩事兩面宿儺會去咗岩手嘅寺院嘅？」
佢「呢層家父就冇同我講喇」
我「嗰陣住持咪好大聲咁講過”點解冇送到去京都嘅寺度！”咁嘅
件事係點？」
佢「呀，你聽到...30年前嘅事嚟。我本身預咗要繼續家父做住持嘅，但因為我嘅怠慢所以遲咗...
之後，嗰間寺都一直丟空埋...我可以講嘅係咁多」
我「明白...咁而家兩面宿儺去咗邊？？」
佢「我都唔知。應該話，呢幾日我都聯絡唔到家父...
好似話自從佢拎走咗之後，俾一架奇怪嘅車跟住」
我「咁樣...你話唔可以講晒全部嘢我知，咁點解又講咁多畀我知嘅？」
佢「家父嗰陣都有講過係咪？好遺憾你哋唔會長命」
我「...」
佢「係咁 唔好再聯絡喇」
我「...多謝晒」
以上就係電話講嘅嘢，大致上係咁...講真唔會信晒
不過有啲唔舒服，今日係咁先，sor又長又幾連咁
日本該當滅亡
但係遭殃嘅係兩個中國人
好睇
呢個好好睇
點解咁恨日本呢...
唔係想奪權而係想毁滅，超驚
整兩面宿儺時用嘅「不服之民」嘅骨
可能喺出雲嘅古墳度挖出嚟
> 佢「自殺 聽聞係咁 同埋有傳聞佢唔係純日本人嚟...」
嗰個時代嘅話...
大正前有日清戰爭 甲午戰爭
記得場仗係令到朝鮮從中國獨立
而且喺之前已經進入咗朝鮮
咁有怨恨都唔奇
點解電話講嘅內容你可以記得咁清楚㗎呢？
可能錄音呱
***全篇完***
成個故事最巧妙係絕大部份係來自引述，所以你唔能夠否定真係親身經歷嘅可能性
因為多數都係老住持講嘅故事嚟
首部份發現乾屍後入院，科學啲講，打開個封咁多年放屍體嘅箱
裡面有大把嘢可以搞到一個人唔正常
而我出呢篇係想分享裡面嘅民俗學同歷史多過故事本身
本譯文原發佈於連登討論區
原link：https://hobby7.5ch.net/test/read.cgi/occult/1126696345/